ILOILO – Madamo ang supply sang illegal drugs sa Bacolod City ipaanggid sa iban nga lugar sa Western Visayas.
Sa interview sang Bombo Radyo kay Shey Tanaleon, acting spokesperson sang Philippine Drug Enforcement Agency 6, iya ginpahayag nga kun basehan ang bili, mas barato ang ginabaligya nga illegal drugs sa Bacolod City kun ipaanggid sa iban nga lugar sa rehiyon.
Suno kay Tanaleon, santo man sa mga buy bust operation, dalagku nga volume sang illegal drugs ang nakuha sa Bacolod City.
Kun tuhoy naman sa mga drug personality, nagpamalibad si Tanaleon nga maghatag sang detalye apang suno sa iya, padayon ang monitoring batok sa mga durugista.
Sa subong, ginpahayag sang natungdan nga nalakip sa ginatutukan sang ahensya amo ang mga lugar nga may yara sang madamu nga supply sang illegal drugs.
Wala sang dapat kakulbaan ang publiko kay Police Lt. Col. Jovie Espinido nga gin-assign bilang Deputy City Director for Operations sa Bacolod City Police Office.
Sa interview sang Bombo Radyo kay Shey Tanaleon, acting spokesperson sang Philippine Drug Enforcement Agency 6, iya ginpahayag nga ginakabig nga asset sang Philippine National Police si Espinido.
Suno kay Tanaleon, may yara sang rason kun nga-a sa Bacolod City gin-assign ang kontrobersyal nga anay hepe nga personal mismo nga kilala ni Philippine Drug Enforcement Agency 6 officer-in-charge Alex Tablate.
Ginpahayag ni Tanaleon nga wala sang dapat kakulbaan ang publiko magluwas lang sa mga iligalista.
Nahibalu-an nga epektibo Oktubre 16, nag-umpisa sa pagserbe bilang Deputy City Director for Operations sa Bacolod City Police Office si Espinido nga nangin kilala bangud sa iya anay area of assignment, lunsay patay ang mga kilala nga durugista.
