Gina-problema mo man bala ang imo nga sodium intake ukon ang pagkonsumo sang mga pagkaon nga may sobra nga asin para nga mas mangin masabor kag maalat?
May yara sang makabulig sa imo paagi sa sining bag-o nga imbensyon sa Japan ukon ang pungsod nga ginalaragway nga “Living In the Future” bangud sa mga abanse sini nga teknolohiya nga mapuslan gid sang mga pumuluyo.
Ang bag-o sini ginatanyag sa publiko amo ang isa ka kutsara nga makasarang maghatag ang maalat nga sabor sa dila sang tawo bisan nga wala man sang madamo nga asin ang iya ginatimo nga pagkaon.
Ini nga kutsara ang may yara sang rechargeable battery nga nagapaguwa sang mahina lamang nga electrical charge nga amo ang nagapaalat sa panabor sang dila.
Suno sa kumpaniya nga nag-imbento sini, tuyo nila nga mabuhinan ang sodium intake sang tawo agud nga mabuligan man ang ila ikaayong lawas.
Kun masobrahan abi ang asin nga gina-consume sang tawo, posible ini magtuga sang mga balatian kaangay sang high blood pressure kag stroke.
Indi basta-basta ini nga kutsara bangud nagalab-ot sa P7,000 ang presyo sini.
Ang Japanese drinks giant nga Kirin Holdings ang magasugod na sa pagbaligya sini subong nga Mayo kag may limited run man sa Japanese retailer sa bulan sang Hunyo. Lunes sang ginlunsar ini nga produkto nga amo man ang nagamarka sang una nga commercialisation sangsini nga teknolohiya.
Sang nagligad nga tuig, nalakip ini sa nagdaog sa Ig Nobel Prize nga amo ang nagakilala sang indi kinaandan nga sahi sang mga research sa bilog nga kalibutan.#
