Ginpaathag sang isa ka abogado nga mahimo lamang nga balabagan sang prosekusyon ang bag-o nga abogado ni former President Rodrigo Roa Duterte kun may nakit-an nga ground nga may yara sang conflict of interest.
Sa interview sang Bombo Radyo kay Atty. Joebert Pahilga, iya ginpahayag nga kun ang bag-o nga abogado ni Duterte ang nakaagi sa pagkonsulta ukon naka-partisipar sa case build-up ukon naka-interview sa testigo sa kaso nga crimes against humanity, pwede ini nga kontrahon sang prosecution panel.
Pananglitan may yara sang “inside information” ang legal counsel suno kay Pahilga kaangot sa mga estratehiya kag mga ebidensya sang prosekusyon, mahimo nga i-raise ini bilang conflict of interest.
Apang pahayag ni Pahilga, sa amo sini kadaku nga setting sa International Criminal Court (ICC), imposible man nga may abogado nga magbaton sang kaso ni Duterte kun nakaagi siya sa engagement sa prosekusyon bangud kun himuon niya ini, mahimo siya nga mangin subject sa administrative disciplinary action sang korte.
Mangin sa Pilipinas suno kay Pahilga, mahimo nga ma-disbar ang abogado kun mag-represent siya sang kaso nga may conflict of interest — halimbawa, kun naka-engage na ang abogado sa nag-akusar apang sang ulihi nagsaylo siya bilang abogado sang akusado.
Wala pa nahingadlan kun sin-o ang magabulos bilang defense counsel kasunod sang pag-withdraw ni Atty. Nicholas Kaufman, apang nauna naman nga ginsiling ni Kaufman nga handa ang bag-o nga counsel nga mag-represent kag makatambong sa status conference sa Mayo 27.
Ginpaathag man ni Kaufman nga ang iya engagement para nga mag-represent kay Duterte ang nagtapos na sang Marso 31, 2026, kag sunod man ini sa desisyon ni Duterte nga magkuha sang bag-o nga abogado nga amo ang maga-represent sa iya sa trial.
Nauna naman nga gin-aprubahan sang ICC ang request sang associate counsel nga si Dov Jacobs nga man sa defense team kasunod sang desisyon ni Duterte nga iga-reorganize sini ang iya team para sa trial phase sang kaso.
