Magatukod si incoming Iloilo City Mayor Jerry Treñas sang bag-o nga foundation nga magatutok sa mga aktibidad may kaangtanan sa Dinagyang Festival.
Sa interview sang Bombo Radyo Iloilo kay Treñas, iya ginpahayag nga ang nasambit nga foundation ang pagabug-usan sang mga pribado nga indibwal kag mga tawo nagikan sa business sector sa syudad sang Iloilo.
Suno sa incoming mayor, dismayado siya sa Iloilo Dinagyang Foundation, Inc. (IDFI) gani nagakaangay lamang nga may bag-o nga mga tawo nga magadumala sang mga aktibidad para sa Dinagyang.
Pagatawgon naman ni Treñas ang bag-o nga foundation nga Iloilo City Festival Foundation.
Ginklaro naman ni Treñas nga indi man niya pagdulaon ang IDFI apang wala siya sang pahayag kun ano ang mangin papel sini sa Dinagyang.
Matandaan nga gin-ako ni Treñas ang iya pagkadismaya sa IDFI matapos nga ginkakas siya bilang Honorary member kag wala man gin-imbitar sang tinalikdan nga Dinagyang Festival sang Enero 2019.
Ginkadismaya man ni Treñas ang kapaslawan sang IDFI nga magpasa sang iya ginhingyo nga financial report.
Samtang ginpasiguro naman ni Treñas nga kadungan sang iya pormal na nga pagpungko bilang alkalde sa Hulyo 1, iya gilayon nga ipa-imbestigaran ang ginapahayag pag-abuso ni outgoing Iloilo City Mayor Jose Espinosa sang pondo sang banwa paagi sa pagpinagusto sa pagbakal sang mga salakyan kag mga equipment nga ginapatihan nga lunsay overpriced.
Suno kay Treñas, may yara na siya sang gintukod nga kumitiba nga pamunuan ni Atty. Edgar Gil nga amo man ang incoming City Legal Officer agud pangunahan ang nasambit nga imbestigasyon.
