Nagpasalig ang bag-o nga director sang Iloilo City Police Office (ICPO) nga padayunon sini ang operasyon kag kampanya batok sa mga dalagku nga truck nga nagabalik-balik sa iligal nga pag-park sa kilid sang national highways sa Iloilo City.
Ini kaangot sa problema sa Mansaya kag Loboc, Lapuz kag pati na sa coastal road nga sakop sang Lapaz kag Jaro.
Sa interview sang Bombo Radyo kay Police Colonel Kim Legada, iya ginpahayag nga wala sila sang kapasidad nga mag-guyod kag mag-impound sang dalagku nga trucks bangud wala man sila sang impounding kag towing equipment.
Bangud sini, ang mahimo lamang sang pulis suno sa natungdan amo ang pag-isyu sang traffic citation tickets sa violators.
Pahayag pa sang natungdan, himuon nila nga adlaw-adlaw ang pag-monitor sa mga dalan nga masami ginatiniran sini nga trailer trucks, amo man ang clearing operations sang police stations kag traffic enforcement unit.
Sa una nga operasyon sang kapulisan sa idalom ni Legada, kaupod sang opisina ang Highway Patrol Group kag ang Transportation Management and Traffic Regulation Office.#
