ILOILO CITY–Madamu sang bentaha ang gintukod nga bag-o nga Iloilo Freedom Grandstand sa Muelle Looney St., City Proper.
Sa interview sang Bombo Radyo kay Engr. Jose Cloyd Grecia sang City Engineer’s Office kag project engineer, iya ginpahayag nga mas daku ang bag-o nga grandstand ipanggid sang una nga naga-atubang pa sa dalan JM Basa, City Proper.
Sa bag-o nga grandstand nga naga-atubang sa Iloilo River, may yara ini nga sitting capacity nga 1,900 tubtub 2,000 kag mahimo pa nga madugangan kun may yara pa sang extension nga pulungku-an.
Magluwas diri, mahandong man ang lugar humalin sa aga tubtub maghapon indi kaangay sa una nga grandstand.
Indi man mainit suno kay Grecia bangud nga ang open grandstand ang nagalapad sang 20 ka metros, nagalaba sang 56 ka metros kag malapad man ang performance area.
Sa subong suno kay Grecia, wala pa sang may ginkasugtan nga bag-o nga pangalan para sa bag-o nga grandstand.
Ginatapos na lang ang pagpinta kag ang pagtakod sang grills kag ini ang matapos bag-o ang pagpatigayon sang Dinagyang Festival 2019 sa Enero 26 tubtub 27.