Iloilo City – Ginbasol ni 2nd District Congressman Arcadio Gorriceta ang apat ka mga opisyal sang banwa sang San Miguel Iloilo nga amo ang nagpamalabag sa pagpatukod sang bag-o nga munisipyo sang banwa.
Suno sa mamalidha, ginpresentar ang plano sang Disyembre 2, 2016 sa isa ka espesyal nga meeting nga ginhiwat sa San Miguel Elementary School sa diin wala man nagmanifest sang kung ano man nga pagpamalabag ang mga opisyal sang banwa.
Nakibot na gid lamang ini sang mabatian nga ginpatawag ang Architect sang Department of Public Works and Highways nga si Christian Mahaducon sang Disyembre 14 angot sa ginaplano nga P20 million pesos nga bag-o nga munisipyo nga ipahamtang malapit sa ila plaza kag ginpisa pisa sang pamangkot.
Particular nga gintumod sang mamalidha sanday Municipal Planning and Development Officer (MPDO) Haydie Biduyas, SB Members Vincent Saclauso kag Jiboy Mondejar, kag ang ginapahayag ni Gorriceta nga amo gid ang nagpulupamuno sa pagpamalabag nga si SB Secretary Layni Sielsa.
Ginkwestiyon man sini ang gin-obra sang SB Secretary nga pagpanguna sa ginpatigayon nga hearing nga para sa mamalidha, indi man dala sa sa iya katungdanan bilang SB Secretary.
Wala pa makahatag sang ila pahayag angot sa isyu ang apat ka mga gintumod nga opisyal sang banwa sang San Miguel, Iloilo.
