Ginbuksan sang Iloilo City Government ang bag-o nga PESO Recruitment Center subong nga adlaw, Agosto 18, 2025, sa second floor sang City Hall.
Sa interview sang Bombo Radyo kay PESO Manager Mx. Gab Umadhay, ang center ginpatukod para sa kahapusan sang mga job seekers nga gusto magpangita sang trabaho.
Pasalig ni Umadhay nga ang mga aplikante nga magsulod sa center may matatap nga staff nga magabulig sa ila, magaconnect sa employer, kag magahatag sang update kon ano na ang status sang aplikasyon.
Kun wala pa sang available nga employer, ang staff mismo ang magapakig-angut sa mga kompanya para sa posibilidad sang placement.
Maluwas sa job matching, ang center man ang magabulig sa mga aplikante sa pagproseso sang dokumento, paghimo kag pagprint sang resume, pagkuha sang ID pictures, kag iban pa nga kinahanglanon sa aplikasyon.
Ginpabutyag man ni Umadhay nga may 5,147 ka job opportunities nga pagatanyag sang center sa Oktubre, kabahin sang logistics, industrial, agriculture, kag BPO sectors.
May 235 man ka oportunidad para sa mga luyag magnegosyo paagi sa entrepreneurship programs.
Ang launching ginpasakupan sang mga key partners halin sa Department of Labor and Employment (DOLE) 6, Department of Migrant Workers (DMW) RO 6, Overseas Workers Welfare Administration (OWWA) 6, kag Technical Education and Skills Development Authority (TESDA) 6.
Gindayaw sang mga ahensya ang pagpanikasog sang syudad sa paghatag sang mas epektibo nga serbisyo sa mga Ilonggo.
Ini na ang ikaduha nga recruitment center sang PESO, matapos sang una nga ginbuksan sa SM City Iloilo, samtang ang ikatatlo yara sa Robinsons Mall.
