ILOILO– Nagpasalig ang bag-o nga Presidente sang Philippine Councilors League , nga himuon niya ang tanan nga iya masarangan sa pagsugod sang iya termino bilang Presidente sang liga.
Sa interview sang Bombo Radyo kay newly elected PCL President Ramon ‘monsik’ Sullano, iya ginphayag nga nalipay siya sa salig nga ginhatag sa iya sang mga kaupdanan.
Suno kay Sullano , himuon niya kun ano man ang mas makapaayo sa bug-os nga organisasyon sang PCL.
Ang mga programa niya nga luyag ipatuman suno kay Sullano, ang ginalakipan sang pagtutok sa kun paano mas mangin malapit sa isa kag isa ang tagsa ka miyembro sang organisasyon, pagpatigayun sang PCL board meeting agud mahibaluan sang tagsa-tagsa ang mga programa, pagpatigayun sang PCL week kag PCL Olympics agud magkilalahay ang mga konsehal sang kabanwahanan.
Ang olympics suno sa iya ang isa ka pamaagi agud mas mapasangkad pa ang physical fitness sang tagsa ka miyembro.
May yara man suno sa iya sang scholarship program para sa mga katapo sang PCL nga luyag mag-eskwela agud mas manginpreparado sila pagkatapos sang ila termino, kag ang nasambit nga scholarship ang extended man sa pamilya sang PCL members.
Sa subong indi naman niya masabat suno sa natungdan ang tuhoy sa isyu nga may nagbulig sa iya lakip na ang isyu sang kwarta sa eleksyon sang PCL.
Samtang sa interview sang ginpahayag naman ni Deparment of Interior and Local Government provincial Director Teodora Sumagaysay, nangin malinong, tayuyon kag orderly ang ginpatigayun nga eleksyon subong nga tuig.
Mas maayo naman ini nga eleksyon kun ikumpara sang nakaligad nga tuig suno sa iya bangud timprano pa natapos.
Sa subong suno sa natungdan, wala pa siya sang may nabatun nga protesta sa nangin resulta sang piniliay.
