Palas-anon naman para sa mga transport cooperative ang bag-o nga price adjustments sa gatong nga ginalauman nga ipatuman subong nga adlaw sang Martes, Oktubre 20.
Sa interview sang Bombo Radyo kay Raymundo “Boyet” Parcon, chairperson sang Western Visayas Transport Cooperative, iya ginpahayag nga nagalaom sila nga magapadayon ang pagnubo sang presyo sang diesel agud mabuhinan ang ila nagadugang nga gasto sa operasyon.
Suno kay Parcon, dako ang epekto sang pagsaka sang presyo sang diesel sa ila kita, gani nagapanawagan sila sa gobyerno nga padayunon ang paghatag sang subsidiya agud may bulig para sa ila sa sektor sang transportasyon.
Ginakilala man ni Parcon nga maayo nga tikang ang mga programa sang gobyerno, apang, iya ginpabutyag nga importante nga indi lamang ini temporaryo kundi padayon agud mabuligan sila sa pag-atubang sang nagabag-o nga presyo sang gatong.
