ILOILO – Magapatigayon sang pagsinapol ang bag-o nga set sang elected officials sa Iloilo Provincial Capitol bag-o ang Hunyo 30.
Sa interview sang Bombo Radyo kay Vice Governor Christine ‘Ting-Ting’ Garin, iya ginpahayag nga sa masunod nga semana patigayunon ang nasambit nga pagsinapol.
Lakip sa ginalauman nga matabo amo ang orientation sa mga incoming nga Board Members tuhoy sa familiarization sang ila tagsa ka opisina kag maistoryahan kun ano ang ila luyag nga komitiba.
Sa bahin naman sang oathtaking ceremony, ginpahayag ni Garin nga wala pa sang pinal nga deklarasyon kun sin-o ang magapanguna sini apang ginaduso nga sa Hunyo 28 ini patigayunon.
Ginatugyan naman sang bise gobernador sa incoming governor kun ano ang mangin dalagan sang seremonya.
Samtang, ginpahayag naman ni Garin nga wala pa siya sang tul-id nga ihibalo tuhoy sa ginpasaka nga election protest ni Iloilo 4th district Cong. Ferjenel Biron.
Suno kay Garin, indi niya luyag nga magbuya sang pahayag samtang wala pa niya mahibalu-an ang kaundan sang election protest.
Sa pihak sini, ginpahayag ni Garin nga mahimo nga may nakita nga rason si Biron agud nga maghingyo sang manual recount sang boto.
Ang ginhimu sang mamalidha suno sa natungdan ang normal lamang sa tion sang eleksyon.
