Nagrekomendar na ang Department of Agriculture (DA) sang panibag-o nga suggested retail price (SRP) para sa bombay subong nga nakit-an ang liwat nga pagsaka sa presyo sini sa mga merkado.
Nagsugtanay ang farmers groups kag iban pa nga agriculture stakeholders nga P150 per kilo ang SRP sa red onions kag P140 kada kilo naman para sa white onions.
Suno kay DA Spokesperson Kristine Evangelista, kinahanglan pa nga maaprubahan ni Senior Agriculture Undersecretary Domingo Panganiban ang amo nga proposal.
Gin-athag man ni Evangelista nga nagpasugot na diri ang stakeholders nga amo ang nagtiglawas sa mga traders kag amo ini ang mangin guide sa pagguwa sang produkto halin sa cold storage.
Nahibaluan nga ginakahangaw-an nga magtimbuok liwat ang presyo sini ilabi na bangud ginpahayag nga may mga merkado na kun sa diin naga-P200 kada kilo ang baligyaanay nga doble sa presyo kada kilo sang nagligad nga Marso. #
