Mamag-an sa balatyagon sang bag-o nga Station Commander sang Philippine Coast Guard (PCG-Guimaras) nga ma-assign sa nasambit nga probinsya bangud maserbisyohan niya ang mga Guimarasnon amo man ang mga taga Iloilo nga nagatabok sa isla.
Si Lt. Junior Grade Lady Dean Cantores, 27 anyos, ang tumandok sang Zarraga, Iloilo kag nagpungko bilang station commander sang Mayo 20.
Si Cantores ang nagtal-os sa ginbayaan nga pwesto ni Lt. Junior Grade Christian Bryan Ignacio.
Sa interview sang Bombo Radyo kay Cantores, iya ginpahayag nga pagkatapos sang iya cadetship program, nagsulod siya sa Philippine Coast Guard tuig 2015 kag gilayon nga gin-assign sa Bicol.
Magluwas sini, na-assign man siya sa Zamboanga, Jolo, Tawi-Tawi kag Cebu City. Suno sa iya, bangud sa pag-assign sa iya sa nagkalain-lain nga lugar, nangin mas mature siya sa serbisyo kag nakatuon sang nagkalain-lain man nga kultura.
Samtang nakig-angot naman ang PCG-Guimaras sa mga punong barangay kag bantay dagat may kaangtanan sa illegal fishing nga nagakatabo sa probinsya.
Nagapati si Cantores nga indi upang ang pagka-babaye agud mangin station commander bangud ginabasehan sini ang eksperyensya kag ikasarang agud tungdan ang responsibilidad.
