Magabukas ang gobyerno sang isa ka bag-o nga talatapan nga magapokus sa pagpauswag sang industriya sang kape sa Pilipinas, suno sa Department of Agriculture (DA).
Ini nga tikang sang DA ang may tinutuyo nga buhion ang sektor sang kape nga sa karon nagapangatubang sang dako nga mga pagpanghangkat.
Base sa Department Order No. 06 nga ginpagwa ni DA Secretary Francisco Tiu Laurel Jr., iya ginmanduan ang pagtukod sang Coffee Industry Development Office (CIDO) agud hugpungon sa isa lamang ka opisina ang mga programa, pondo, kag polisiya para sa kape nga anay ginadumalahan sang nagkalain-lain nga mga unit.
Suno kay Tiu Laurel, paagi sini makaangkun sang separado nga opisina nga magatutok lamang sa pagpauswag sang industriya sang kape.
Dugang pa niya, madugay nga ginakabig nga ikaduha lamang nga tanum ang kape, apang karon kinahanglan na ini hatagan sang mas dako nga atensyon kag estratehiko nga pagdumala.
Ang bag-o nga talatapan ipahamtang sa idalum sang Office of the Undersecretary for Special Concerns and Official Development Assistance sang DA.
Ang pagtukod sang CIDO nakabase sa Executive Order No. 292 ukon ang Administrative Code of 1987.
.){kind=link}