𝗠𝗔𝗡𝗜𝗟𝗔 — Nagsugod na si former Senator Sonny Angara sa iya trabaho bilang bag-o nga tiglikom sang Department of Education (DepEd) kag amo man nga tion, naghalin ini bilang senador.
Kahapon nga adlaw, ginhiwat ang turned over ceremony sa DepEd Complex sa Pasig City, kag gintugyan ni Bise Presidente Sara Duterte kay Angara ang pagpamuno sang nasambit nga departamento.
Antes sini, una nga ginlibot ni Duterte si Angara sa sulod sang DepEd building.
Sa iya katapusan nga speech bilang outgoing DepEd secretary, ginbida ni Duterte ang mga proyekto kag programa nga ginpatuman sini sa sulod sang duha ka tuig sa idalum sang iya pagpamuno sa departamento sang edukasyon.
Lakip diri ang Matatag agenda, K to 10 Matatag Curriculum, pagrepaso sang Senior High School curriculum, paglunsar sang National Learning Recovery Plan, kag pagbalik sang in-person classes.
Sa iya speech, ginpasalig ni Angara nga magatrabaho siya gilayon.
Suno kay Angara, mapainubuson sini nga ginabaton ang posisyon, bilang sabat sa pagsalig kag pagpanghangkat sang Presidente nga labaw pa sa pagpataas sang mga programa nga magaduso sang mataas nga kalidad sang edukasyon para sa mga estudyante.
Dugang niya, himuon sini ang tanan agud malab-ot ang mga pagbag-o kag reporma nga nagasanto sa mga tinutuyo sang isa ka Bagong Pilipinas.
Sa pihak nga bahin, nagpasalamat si Angara kay Duterte kag sa iban pa nga mga opisyal sang DepEd nga nag-resign bangud sa mga programa nga ila gin-umpisahan kag sa matawhay nga transisyon sang posisyon.
Kadungan sang pagpungko sa iya bag-o nga trabaho bilang DepEd secretary, nagpadala man sang sulat si Angara kay Senate President Francis “Chiz” Escudero, agud ipahibalo ang iya pagbiya bilang senador epektibo kahapon nga adlaw Huwebes, Hulyo 18.
Natalana kuntani nga tapuson ang termino bilang senador ni Angara sa Hunyo 2025 matapos makaduha ka beses ini nga napilian sa amo nga posisyon.
Una siya nga napilian nga senador sang 2013 nga eleksyon para sa anum ka tuig nga termino; kag napilian liwat sang 2019 para sa isa pa ka anom ka tuig nga termino nga matapos kontani sa 2025.
