ILOILO CITY – Indi pa mahibaluan subong kun bala makabig nga “variant of concern” ang pinakabag-o nga variant sang COVID-19 nga na-detect sa gwa sang pungsod.
Ang Omicron XE ang combination sang A.1 kag A.2 nga variant sang Omicron.
Sa interview sang Bombo Radyo kay Dr. Philip Ian Padilla, public health expert kag Vice Chancellor for Academic Affairs sang University of the Philippines-Visayas, iya ginpahayag nga tuman pa ka nubo sang datos nga natipon sang World Health Organization (WHO).
Bangud sini, indi pa matumod ang epekto sini kag kun bala, makalalaton ini.
Dugang pa ni Padilla, base sa pila ka pagtuon, 10% nga mas makalalaton ini kun ikumpara sa original nga variant.
Sa subong, indi pa advisable ang pagpanirado sang border sang pungsod bangud wala pa sang available nga data angut sa bag-o nga variant.
Ang balantayan suno kay Padilla amo ang mangin resulta sang biosurveillance sang Philippine Genome Center.
Nagpanugyan naman si Padilla sa publiko nga importante ang booster shot bangud mapanubo sini ang epekto sang COVID-19 virus sa lawas.
