ILOILO CITY- Narekober sang otoridad sa sulod sang Bureau of Jail Management and Penology sa Ungka, Jaro ang iligal nga druga nga nakasulod sa medyas.
Sa interview sang Bombo Radyo kay Jail Superintendent Atty. Jairus Anthony Dogelio, Jail Warden sang pasilidad, iya ginpahayag nga may nakit-an sila nga medyas nga ginhaboy kag sang ila ginlantaw, may unod ini nga baso, kaha sang sigarilyo kag duha ka sachets sang suspected shabu.
Suno kay Dogelio, nagtupa pa ang medyas malapit sa on-duty nga tower guard rason nga madasig ini nga nakit-an.
Pahayag ni Dogelio, ginapatihan nga sa likod sang Male Dormitory nagplastar ang sin-o man nga naghaboy sang suspected nga iligal nga druga.
Nagpasalig naman ini sa publiko nga indi mag-untat ang ahensya sa pagtapna sang pagpalusot sang iligal nga droga sa amo nga pasilidad.
Nagapati naman si Dogelio nga ang natabo isa ka pamatuod nga nagapangita sang bag-o nga pamaagi ang mga durugista nga makapasulod sang droga sa jail facility bangud sa tuman ka istrikto ang mga personnel sa entrance gate sa pag-check sang mga gamit sang sin-o man nga nagasulod gani indi madali-dali ang pagpalusot sang illegal drugs.
