ITBAYAT, BATANES – Wala na sang may mabatian nga bagting sa lingganay sa Itbayat, Batanes matapos nga napatay ang siyam ka mga residente bangud sa linog.
Nagguba ang istruktura mismo sang century-old historic bell sang Santa Maria de Mayan Church.
Gintukod ang simbahan sang tuig 1853 sa diin mabatian ang pagbagting sang lingganay sa tion nga may mapatay sa Itbayat.
Apang bangud sa makahalanusbo nga hitabo sa nasambit nga lugar nga may siyam ka mga patay, ang bagting sang lingganay ang indi na mabatian.
Samtang ang tatlo ka mga napatay ang ginhaya sa evacuation area sa Itbayat Plaza sa diin ginabanta 2,000 ka mga apektado nga residente ang temporaryo nga nagatinir.
Gindeklara naman ang state of calamity sa Batanes.
Ginabanta nagabalor P47 million ang halit nga gintuga sang linog.
Nahibaluan nga nagpadulong si Presidente Rodrigo Duterte sa lugar sa diin iya ginpromisa nga magahatag ini sang P40 million agud nga umpisahan ang rehabilitasyon.
Sa pihak nga bahin, emosyonal naman ang mga lokal nga ospiyal matapos makit-an ang pagkaguba sang Itbayat.
Suno kay Batanes Rep. Ciriaco Gato, mabudlay punggan ang iya nabatyag nga kasubo nga makit-an ang lugar nga iya gindaku-an kag ginpangabudlayan sang mga tawo nga panamion apang nagguba lamang.
Pahayag naman ni Batanes Governor Marilou Cayco, wala siya naghibi sang nag-igo ang bagyo Ferdie sa Batanes apang naghibi ini sa pagtay-og sang linog bangud madamo ang napatay, nasakitan kag nagguba ang mga balay.
