Nagbilin sang lima ka patay kag linibo naman ka mga residente ang nag-evacuate halin sa ila nga mga balay bangud sa halit nga dala sang Bagyo Basyang.
Tuman ka dako naman ang epekto sang bagyo sa mga pamilya sa syudad sang Cagayan de Oro, kun sa diin isa ka landslide sa Barangay Agusan ang nagpatay sa apat ka miyembro sang pamilya dala na diri ang mag-asawa kag duwa ka mga bata.
Sa Iligan City, Lanao del Norte, isa ka radio broadcaster ang napatay bangud sa cardiac arrest matapos ginsul-ob sang tubig-baha ang iya apartment.
Gindeklarar man ang state of calamity sa amo nga syudad agud magamit ang calamity fund para sa relief operations kag makaayo ang naguba nag mga pasilidad kasunod sang malapad nga pagbaha, landslide, kag halit sa imprastraktura.
Suno kay Junie Castillo, spokesperson sang Office of the Civil Defense, madamo sa mga probinsya ang sa karon wala sang suplay sang kuryente kag ang iban napilitan na lang nga mag-evacuate.
Sa Misamis Oriental masobra 32,700 ka tawo ang nag-evacuate, samtang sa Camiguin naman masobra 2,100 ka tawo ang naghalalin sa ila mga balay.
Mabaskog naman ang epekto sang bagyo sa Cebu nga nagbilin sang 350 ka mga pasahero nga na-stranded sa nagkalain-lain nga pantalan.
Sa kabilugan nga probinsya sang Cebu 58 ka mga evacuation centers ang ginpahamtang agud masayluhan sang mga apektado.
Ginkansela naman sang Police Regional Office 7 ang tanan nga leave sang mga pulis kag ginpatuman ang “heightened alert” status.
