Ginpanubo na lamang sa typhoon ang kategorya sang anay Super Typhoon Carina nga rason sang halos pag-anaw sang mga lugar sa Pilipinas partikular sa National Capital Region.
Sandig sa 5:00 A.M. weather bulletin sang PAGASA, nakasaad nga nagatabok na subong ang bagyo sa Taiwan kag malapit na sa naaminhan nga boundary sang Philippine Area of Responsibility.
Ulihi nga nasiplatan ang bagyo sa kalayuon nga 465 km naaminhan sang Itbayat, Batanes ukon sa vicinity sang Hsinchu County, Taiwan.
Dala sini ang kabaskugon sang hangin nga 150 km/h malapit sa sentro kag pagmadlos nga tubtub sa 250 km/h. Nagahulag ini sa direksyon nga pa-naaminhan sa kadasigon nga 20 km/h.
Apisar nga manug-guwa na ini sa Pilipinas, ang Batanes ang nagapabilin gihapon sa Wind Signal No. 1 kun sa diin mabaskog ang hangin sa sulod sang 36 ka oras kag may dala nga minimal to minor threat sa kabuhi kag propiedad.
Ginalantaw nga indi na mangin direkta ang epekto sang bagyo sa Pilipinas apang ang Habagat nga ginpabaskog sini nga Bagyo Carina ang magadala gihapon sang mabaskog nga pag-ulan sa lain-lain nga lugar ilabi na sa western portion of Luzon halin subong nga adlaw tubtub sa Sabado.
Gina-forecast man nga magaguwa si Carina sa PAR subong nga aga, magatabok sa Taiwan Strait kag maga-landfall sa southeastern China karon sa hapon ukon sa gab-i.
