Ginkumpirma sang state weather bureau nga nakaguwa na sa Philippine Area of Responsibility (PAR) si Bagyo Ramil.
“As of 8:00 AM today, 20 October 2025, Tropical Storm Fengshen (formerly “RAMIL”) is being monitored OUTSIDE the Philippine Area of Responsibility (PAR),” suno sa ahensya.
Ulihi ini nga nakit-an sa kalayuon nga 420 kilometros nakatundan sang Sinait, Ilocos Sur dala ang kabaskugon sang hangin nga 85 km/h kag pagmadlos nga tubtub sa 105 km/h.
Nagahulag ini sa direksyon nga pa-naaminhan- nakatundan sa kadasigon nga 25 km/h.
Antes nakaguwa sa PAR, nagbilin ang bagyo sang daku nga halit bangud sang madamol nga pag-ulan kag lapnagon nga pagbaha sa Western Visayas, Eastern Visayas, central kag southern Luzon, kag Bicol.
Masobra sa 22,000 ang nag-evacuate suno sa data sang National Disaster Risk Reduction and Management Council (NDRRMC).
Sa probinsya sang Capiz, lima ang nakumpirma nga patay (as of press time) bangud sa amo nga bagyo.
