Nagalaslas subong ang Bagyo Tino sa Camotes Islands kag may dala nga makusog nga hangin samtang nagahinampot sa Cebu.
Base sa 5:00 a.m. weather bulletin sang Philippine Atmospheric, Geophysical and Astronomical Services Administration (PAGASA), ulihi nga nakit-an ang mata sang bagyo sa kadagatan nga sakop sang San Francisco, Cebu.
Dala sini ang kabaskugon sang hangin nga 150 km/h malapit sa sentro kag pagmadlos nga tubtub sa 205 km/h. Nagahulag ini sa direksyon nga pa-nakatundan sa kadasigon nga 25 km/h.
WIND SIGNALS SA WESTERN VISAYAS
Nagapabilin sa Wind Signal No. 4 ang Iloilo City kag ang mga areas nga sakop sang central kag southern portions sang probinsya san Iloilo bangud sa Bagyo Tino.
Sa idalom sini nga signal number, may warning lead-time nga 12 oras, 118 to 184 km/h ang range sang kadasigon sang hangin, kag may daku nga peligro nga dala sa kabuhi sang tawo kag sa mga propiedad.
Lakip diri nga areas ang Calinog, New Lucena, Maasin, Oton, Concepcion, Pavia, Dueñas, Barotac Nuevo, Guimbal, Ajuy, Iloilo City, Tigbauan, Anilao, San Miguel, Leon, Mina, Santa Barbara, Barotac Viejo, Leganes, Dingle, Zarraga, Bingawan, Cabatuan, Alimodian, Dumangas, San Joaquin, San Rafael, San Enrique, Badiangan, Banate, City of Passi, Pototan, Lambunao, Lemery, Tubungan, Igbaras, Janiuay, Miagao, San Dionisio, kag Sara.
Signal number 4 man ang Guimaras kag ang southern portion sang Antique lakip ang Valderrama, Patnongon, San Remigio, Sibalom, Belison, San Jose, Hamtic, Tobias Fornier, Anini-Y, kag Bugasong.
Sa pihak nga bahin, Signal number 3 naman sa nabilin nga bahin sang Iloilo; southern portion sang Capiz (Tapaz, Mambusao, Jamindan, Dumalag, Dumarao, Cuartero, Dao, Panitan, Pontevedra, Sigma, President Roxas, Ma-Ayon, Pilar); kag central portion sang Antique (Tibiao, Laua-An, Barbaza).
Napasaka naman sa Signal no. 2 ang Aklan kag ang nabilin nga bahin sang Capiz kag nabilin nga bahin sang Antique lakip na ang Caluya Islands.
Kaina sang 12:00 sang tungang gab-i, nag-landfall ang bagyo sa Silago, Southern Leyte.
Base sa track forecast, magalabay ini sa Visayas. 2:00 karon sa hapon, ginalantaw nga magalabay ang bagyo sa coastal waters sang Patnongon, Antique antes magdiretso sa Palawan.
Buwas sa aga, magatuhaw ang bagyo sa West Philippine Sea.
Maga-guwa ini sa Philippine Area of Responsibility (PAR) sa buwas sang gab-i ukon sa Huwebes sang aga.
Bangud magaagi ini sa kabukiran sang Visayas, magahina ini apang magapabilin nga yara sa typhoon category samtang yari diri sa Pilipinas.
Sa pihak nga bahin, nagtaas naman ang tyansa nga mangin isa ka Tropical Depression sa masunod nga 24 oras ang isa ka Low Pressure Area (LPA) nga yara sa guwa sang PAR. Ulihi ini nga nakit-an sa kalayuon nga 2,165 km nasidlangan sang northeastern Mindanao.#
