Naglab-ot sa hawak ang kataason sang baha sa Sta. Rosa, Tagbak, Jaro, Iloilo City matapos nga nagbubo ang mamunog nga ulan kagab-i.
Sa interview sang Bombo Radyo kay Janet Ramos, residente sang nasambit nga lugar, iya ginpahayag nga madugay na nga problema ang madasig nga pagtaas sang tubig-baha sa amo nga lugar.
Suno kay Ramos, bisan sila ang nakulbaan bangud tuman man ka tunog ang pagpangilat nga may dala nga mabaskog nga ulan.
Dugang sini nga kon tayuyon ang ulan, nagalab-ot gid ang kataason sini nga makatupong sa ila tay-tay.
Gintuad man sang natungdan nga lakip sa mga ginalantaw nga rason amo ang pagsupon sang mga basura ilabi na sang mga non-biodegradable ukon plastic sa kanal.
Gin-ako man ni Ramos nga ‘first time’ ini nga natabo sa ila kag subong lang gid nga nangin tuman ka taas ang baha.
Ginsaysay man sini nga bisan ang salakyan ang indi maka-agi sa lugar bangud malab-ot sang baha ang makina sini.
Ginakahangaw-an man sang amo nga residente nga liwat masulit ang gulpiyada nga pagtaas sang baha.
Sa subong, amat-amat na nga naganubo ang baha sa ila nga lugar.
