Gina-engganyo ni Senador JV Ejercito ang gobyerno nga gamiton ang kabahin sang P250 billion nga pondo para sa mga flood control projects sa sa pagpatuman sang dalagkuan nga mga imprastraktura kontra sa pagbaham particular sa Central Luzon, samtang ginahulat ang mga reporma sa Department of Public Works and Highways (DPWH).
Sa hearing sa 2026 national budget, ginsiling ni Ejercito nga apisar ginmanduan ni Presidente Ferdinand Marcos Jr nga i-reallocate anay ang nasambit nga pondo sa mga social programs kaangay sang AICS, AKAP, kag TUPAD.
Suno sa iya, nagakadapat man nga siguruhon nga madayon ang mga proyekto nga makasabat sa problema sang pagbaha.
Pahayag pa niya, indi dapat pagpabay-an nga sa masunod nga duha kag tatlo ka tuig magapadayon nga lubog sa baha ang pungsod.
Dugang pa sang senador, ini na ang husto nga tuon agud i-channel ang kabahin sang P250 billion sa mga big-ticket projects kaangay sang floodways, dams, spillways, kag water impounding facilities.
Samtang, ginkumpirma ni Public Works Secretary Vince Dizon nga sa subong magapatigayon ang Detailed Engineering Design (DED) para sa Central Luzon Floodway Project, nga ginpondohan sang Asian Development Bank (ADB).
Suno kay Dizon, kun natapos ang DED mangin “shovel-ready” ukon handa nga umpisahan ang konstruksyon sang mga proyekto sa idalom sang Central Luzon Floodway Master Plan.