Text by: Bombo Ray Gerald Badiang
Wala gihapon sang face-to-face nga klase sa Pis-anan National High School kag Pis-anan Central School sa banwa sang Sibalom, Antique.
Ini apisar subong na kuntani nga adlaw, Hulyo 16, natalana nga makabalik ang mga estudyante sa eskwelahan matapos nga gin-suspend ang klase kasunod sang natabo nga chemical poisoning nga nagresulta sa pagkalipong sang 200 tubtob 300 ka mga kabataan.
Nahibaluan nga ginpatigayon ang decontamination sa mga classroom sang Hulyo 14 kag 15, gamit ang pressurized water kag dishwashing soap agud malimpyuhan ang palibot kag malikawan ang epekto sang baho nga una na ginreklamo sang mga ginikanan.
Apang base sa inisyal nga ebalwasyon, may yara pa sang mahaklo nga baho sang chemical sa pila ka parte sang eskwelahan, rason nga ginpili sang lokal nga pamunuan nga indi anay pagpabalikon ang mga kabataan.
Ginpaguwa ni Sibalom Mayor Gian Carlo F. Occeña ang executive order nga nagamando nga padayon sa Alternative Delivery Mode ang klase tubtob nga masiguro nga limpyo na kag wala sang baho ang classrooms.
Sa interview sang Bombo Radyo kay Mr. Hernani Escullar Jr., spokesperson sang DepEd Region 6, ginpahayag sini nga apisar nga face-to-face classes gid ang ideal nga setup para sa pagtudlo sang mga kabataan, ginrespeto nila sa gihapon ang desisyon sang lokal nga gobyerno kag ang mga guidelines sang DILG bangud prayoridad ang safety sang mga estudyante.
Padayon subong ang ginapatigayon nga decontamination sa eskwelahan, kag ginapaabot sang mga otoridad nga sa mas madali nga panahon, makabalik na sa face-to-face classes ang mga estudyante.
