ILOILO CITY – Madalum nga pilas sa liog ang naangkon sang isa ka bajao matapos nga ginbuno sang kasubong nga bajao sa Brgy. Tagbak, Jaro, Iloilo City.
Sa interview sang Bombo Radyo kay Melchor Magnate, security guard sang isa ka convenience store, iya ginpahayag nga antes pa man natabo ang pagbun-anay, may yara pa sang komosyon nga natabo sa tunga sang biktima kag sang suspek.
Suno kay Magnate, ginbulag pa sang isa pa gid ka bajao ang biktima nga nagpakilala sa pangalan nga Willy Tane kag ang suspek nga si certain Salangan.
Ginpahayag ni Magnate nga magkaupod pa nga nagpanihapon sa convenience store ang mga bajao kag pagkaligad sang pila ka segundo, natabo na ang pagbuno sang suspek sa biktima.
Ginabanta nga kapin sa isa ka dangaw ang pilas nga naangkon sang biktima nga gilayon naman nga gindala sa hospital.
Sang ginpamangkot naman ang mga kaupod nga bajao, indi nila kilala ang suspek kag limitado lamang ang ila impormasyon nga ginhatag.
