Indi mahangpan ni Iloilo 1st District Representative Dr. Janette Garin kun ngaa siya ang ginhingadlan ni Davao City Rep. Paolo Duterte nga nagpanguna sa pagtipon sang pirma para nga madasig nga ma-impeach si Vice President Sara Duterte sa Kamara.
Sa statement nga gin-release ni Cong. Pulong kahapon, ginpahayag sini nga akig siya sa desperado kag politically-motivated nga mga lihok para dasigon ang impeachment batok sa iya utod. Gintawag man sini ang impeachment case nga wala sang basehan kag klaro nga akto sang political persecution.
Sa interview naman sang Bombo Radyo Philippines kay Garin, ginpahayag sini nga daku nga kuryente kag indi matuod ang impormasyon nga siya ang nanguna sa pagtipon sang mga pirma.
Ginklaro sini nga wala man siya nagpangampanya para diri kag wala nagpangumbinse sa iban bangud kada kongresista ang may yara man sang constituency kag indi madali nga istoryahon kun may yara man sila sang panindugan.
Suno kay Garin, nagpirma lamang siya sa impeachment complaint bangud nga indi niya matalikdan ang iya constitutional duty kag nakit-an man sini nga klaro ang mga ebidensya batok kay Duterte ilabi na sa betrayal of public trust.
Nagapati man si Garin nga posible nasal-an lang siya ni Cong. Pulong bangud nga ang nagpaathag sang ikaapat nga impeachment complaint nga gin-file sa Kamara amo si House Deputy Speaker Jayjay Suarez nga ginatawag man sang kadam-an nga si “Cong Jay.”
Suno kay Garin, ginatawag man siya bilang si “Cong J” sa Kamara gani posible nga lain nga “J” ang napalab-ot sa impormasyon ni Cong. Pulong kag wala na na-check sang maayo antes ang press release.
Pahayag sini, kuntani lantawon man sang maayo ni Congressman Duterte ang mga impormasyon nga iya mabaton. Gindugang man sini nga madugay-dugay na nga wala nagakadto sa hearings sa Kamara ang amo nga kongresista gani nga wala sini nagakakita kag nagakabatian kun ano gid ang nagakatabo sa chamber.
Base sa verified complaint, gin-move sang complainants nga i-impeach si Duterte base sa grounds sang Culpable Violation of the Constitution, Betrayal of Public Trust, Graft and Corruption, and Other High Crimes.
Bangud lapaw ang 215 sa one third sang House membership nga 306 ka mga kongresista, yara na sa Senado ang bola sandig sa kun ano ang nakasaad sa 1987 Constitution.
Kahapon amo man ang katapusan nga adlaw sang session para sa Kamara kag Senado antes ang pahuway para sa national and local elections.
