POTOTAN, ILOILO – Kapin sa 30 ka minutos antes napalong ang kalayo sa isa ka bakery sa Brgy. Bongco, Pototan, Iloilo malapit lang sa boundary sang Bangga Bante, Zarraga, Iloilo.
Ang bakery ang ginapanag-iyahan ni Aquilino Opsar sang Brgy. Balud 1 sa banwa sang Zarraga.
Antes pa man naka-abot ang mga bombero, nagbuligay ang mga residente agud nga mapalong ang kalayo.
Sa interview sang Bombo Radyo kay Opsar, iya ginpahayag nga antes siya nagpauli, iya nga gin-check ang tanan nga makinarya ilabi na ang oven agud nga masiguro nga hilway sa sunog.
Suno kay Opsar, bisan siya ang wala sang ideya kun sa diin naghalin ang kalayo.
Bangud nga may yara sang firewall, wala na naglapta pa ang kalayo sa iban pa nga stall nga napahamtang sa duta sang pamilya Camagan.
Wala naman sang may napilasan sa nasambit nga insidente.
