ILOILO CITY – Mapisan, hipuson kag dedikado sa trabaho.
Ini ang pagkilala sang mga katapo sang Bombo Alumni Association (BALA) kay the late Iloilo City Councilor Armand Parcon.
Sa pagpahayag ni BALA member Nenen Barnuevo, si Parcon ang iya anay kaupod nga reporter kag masami sila nga naga-updanay sa pag-duty sa Bombo Patrol sang tuig 1990’s.
Sa kadugayon nila bilang Patrol reporter, wala gid nakitaan sang katamad si Parcon sa pihak sang kakapoy kag kasakuon sa trabaho.
Tuig 1999 tubtub 2000, nangin isa ka anchorman si Parcon sa programa ‘Ikaw kag ang Kasuguan’ ukon mas kilala na subong nga Dura Lex Sed Lex sa tagsa ka adlaw sang Dominggo.
Magluwas diri, naga-anchor man sadto si Parcon sa Bombohanay sa Gab-i kag reliever anchor sa iban pa nga programa sang Bombo Radyo Iloilo kag nangin beat reporter sa Iloilo Provincial Capitol kag Hall of Justice.
Nadumduman man ni Barnuevo ang mga ‘mannerism’ ni Parcon sa pagreport ukon pag-anchor.
Ginpakigbahin man ni Barnuevo nga sa ila nga pag-updanay bilang Bombo Reporter, madamu na sila sang ginrespondehan nga mga hitabo kasubong sang aksidente kag encounter.
Naka-agi man suno kay Barnuevo nga nalipong si Parcon matapos nga makita ang tawo nga ginlasak sang truck.
Sa pihak sang kahinaan sa mga kasubong nga hitabo, wala ini nangin upang kay Parcon sa pagdul-ong sang husto nga balita.
Sang 2001, nahatagan sang kahigayunan si Parcon nga magkandidato kag nagdaug bilang konsehal sa syudad sang Iloilo.
