ILOILO CITY – Malapit na maubos ang bala sang terorista nga Maute, masobra tatlo ka bulan na sumugod nga nagluntad ang giyera sa tunga sang grupo kag sang tropa sang gobyerno.
Ginpahayag sa Bombo Radyo ni Lanao del Sur Assemblyman Zia Alonto Adiong nga nagahina na ang balos sang mga terorista sa ti-on nga magluntad ang engkuwentro bangud nagakaubos na ang bala sang mga ini.
Apang ginauyatan sa gihapon sang mga rebelde ang indi magnubo sa 30 ka mga hostages.
Santu sa pinakaulihi nga impormasyon nga ila nakuha, gindala sang Maute ang mga hostages lakip na ang Ilonggo priest nga si Fr. Teresito “Chito” Suganob malapit sa Bato Ali mosque nga sunod nga target sang militar matapos mabawi ang grand mosque.
Ang Bato Ali ang isa sa mga ginakabig nga religious icon sa Marawi suno sa opisyal.
Samtang gin-athag naman ni Adiong nga indi hostages ang kadam-an sang mga child warrior karon sang Maute.
Suno sa opisyal, madugay na nga rescruit sang terorista nga grupo ang mga child warrior antes pa man nagluntad ang giyera.
Ang mga child warriors suno kay Adiong ang rason kun nga-a mahinay ang operasyon sang militar agud dalayon na nga mabawi ang Marawi City gikan sa mga Maute terrorists.