ILOILO CITY – Padayon pa nga gina-imbestigaran sang otoridad ang natabo nga pagsalakay sang mga ginapatihan myembro sang terorista nga grupo sa detachment sang 2nd Platoon sang 1st Iloilo Provincial Mobile Force Company sa Barangay Mayang, Tubungan, Iloilo.
Sa interview sang Bombo Radyo kay Police Major Mary Grace Borio, spokesperson sang Police Regional Office 6, iya ginpahayag nga nagataghol ang mga ido sa palibot sang detachment gani, gintsekyar sang on duty personnel.
Sa ubos sang Mayang Primary School, nakita sang amo ang personnel ang isa ka tawo nga nakasuksok sang full battle gear nga may bitbit nga malaba nga armas.
Didto na kag natabo ang pagbayluhanay sang lupok.
Gilayon naman nga nagplastar ang iban pa nga katapo sang 1st Iloilo Provincial Mobile Force Company.
Suno pa sa iya, padayon pa nga ginahibalo sang kapulisan ang identity sang mga rebelde nga yara sa likod sang insidente.
Ginklaro man sang natungdan nga wala sang pulis nga pilason ukon napatay sa nasambit nga hitabo.
Apang, padayon pa nga ginahibalo sang otoridad kun may napilasan sa bahin sang mga rebelde.
Na-recover sa lugar ang nagkalain-lain nga bala sang armas kag granada.
Nagpanugyan naman ini sa mga residente nga mangin alerto kag i-report sa gilayon sa mga otoridad sa tion nga may yara sang makita nga makaduluda nga hitabo sa palibot.
