Padayon ang imbestigasyon sang mga kapulisan sang Pavia Municipal Police Station sa bala sang armas nga nagtalang sa isa ka balay sa Barangay Pandac, Pavia, Iloilo.
Sa interview sang Bombo Radyo kay PCapt. Ryan Orleans, Deputy Chief of Police, iya ginpahayag nga pasado ‘la una sang kaagahon,kahapon, Enero 1, 2025, sang nagahimos nga magtulog ang isa ka pamilya, nakit-an sang tagbalay nga may lusbot na ang ila nga kisame.
Base sa imbestigasyon sang kapulisan, naglusot ang bala sa atop sang balay.
Sang gin-check sang tagbalay ang ila kwarto, nakit-an sini ang bala sang armas sa hiligdaan.
Suno kay Capt. Orleans, wala sang may nabatian ang tabalay nga lupok halin sa armas bangud nagapadayon man ang pinalupok sang firecrackers sa lugar.
Wala naman sang may napilasan sa insidente.
Gina-proseso na sang Pavia MPS ang pagpadala sang bala sa Regional Forensic Unit.
Sa subong, gina-check na sang kapulisan ang lugar agud matumod kun sin-o ang nagpalupok sang armas.
