Nakarecord ang Iloilo City sang pinakauna nga stray bullet incident subong nga 2025.
Sa interview sang Bombo Radyo kay Police Staff Sergeant Isaac Nerios, imbestigador sang Iloilo City Police Station 8, iya ginpahayag nga nakit-an ang stray bullet sa katre sa sulod sang kuwarto sang balay sang pamilya Senina sa Villa San Lorenzo sa Loboc, Lapuz.
Suno kay Nerios, nadiskubre na lang sang bata nga babaye sang amo nga pamilya nga may buho sa ila kisame.
Bangud nga nagdumdom sila nga possible agi ini sang bala, ila ini ginpangita kag nakit-an ini sa ila hiligdaan.
Ang slug ang posible nga iya sang 45 caliber pistol.
Pahayag ni Nerios, maswerte nga wala sang tawo sa amo nga balay bangud nga sa hotel nagselebrar sang new year ang amo nga pamilya.
Padayon pa subong ang imbestigasyon sang kapulisan sa amo nga stray bullet incident.
