Pagdako sang vital organs kaangay sang tagipusuon kag atay sa lawas sang tawo ang pila sa mga resulta sang balatian nga Beta thalassemia.
Sa interview sang Bombo Radyo kay Dr. Joselito Caso, pediatric hematologist, iya ginpahayag nga ang nasambit nga balatian ang heriditary.
50 percent suno sa doktor ang posibilidad nga makaangkon sang Beta thalassemia ang isa ka indibidwal kun may yara sang kaangay nga balatian ang iya mga ginikanan.
Suno kay Dr. Caso, ang Beta thalassemia ang isa ka balatian sa dugo nga nagabuhin sang produksyon sang hemoglobin nga amo ang responsable sa paghatag sang oxygen sa lawas sang isa ka tawo.
Ginpahayag ni Casa nga ang mga indibidwal nga nagusuprir sang amo nga balatian ang makaangkon man sang anemia ukon kakulang sang red blood cells, sa diin nagalapsi ang panit, nagahina ang immune system, gabuhin ang bug-at ukon wala nagadako, nagabatyag sang fatigue kag iban pa nga mga kumplikasyon.
Dako man nga risgo suno sa iya nga mag-angkon sang abnormal nga blood clots kag paglapad sang mga organs sa lawas ang mga pasyente nga may Beta thalassemia.
Yari naman ang pila ka mga pamaagi agud mabulong ang balatian nga Beta thalassemia:
- Regular nga pagpatughong sang dugo
- Pagpaidalom sa ‘chelation therapy’ agud mabuhinan ang extra iron sa lawas sa sulod sang tatlo tubtob apat ka semana
- Daily maintenance sang folic acid nga bulong
- Pagpaidalom sa surgery kun kinahanglan
- Regular nga pagpacheck-up sang tagipusuon kag atay
- Genetic nga mga test; kag
- Pagpaidalom sa bone marrow transplant
