Tanan kita handom nga makapatindog sang balay.
Ang iban nagabakal na lang sang human na nga balay apang may tawo naman nga may yara sang luyag nga istruktura sang balay ukon disenyo rason nga nagapa-construct ini — bungalow man ina, two-storey ukon three-storey house.
Apang kun nagapangita ikaw sang balay nga human na, dako, malapad, may swimming pool kag may ice cream station, indi magkabalaka bangud didto sa Westerville, Ohio sa Estados Unidos, may yara yara sang balay nga mapa-WOW ka gid.
Kun imo makit-an sa guwa ang itsura sang balay, daw kaangay lang man ini sa mga balay nga imo makita sa mga subdivisions sa diin may yara sang gamay nga garden kag garahe.
May yara ini sang apat ka kwarto kag tatlo ka bathrooms gani “swak” gid ini para sa imo nga pamilya.
Ang ini nga balay ang perfect para sa mga ice cream lovers bangud may yara sang ice cream factory sa kusina sa diin imo makit-an ang mga flavors nga lain-lain depende sa imo nga naluyagan.
Kun sa imo pagdumdom, ang garahe sang balay ang para sa salakyan, motorsiklo ukon bike, dira ka gid nagsala bangud kun buksan mo ang garahe, swimming pool gali ang imo nga makit-an.
Ti kun dream house mo na ini, ipreparar na dira ang imo inugbakal bangud ginabaligya ini sang tag-iya sa balor nga $338,000 ukon P16.4 million.
