ILOILO CITY–Aminado ang mga opisyales sang Brgy. Railway, La Paz, Iloilo City nga madamo pa ang illegal structures kag madata gihapon ang on-road parking sa ila lugar apisar sang istrikto nga implementasyon sang road clearing operation.
Sa interview sang Bombo Radyo Iloilo kay Punong Barangay Reynaldo Guillergan, iya ginpahayag nga talalupangdon gid ang salawayon nga mga tricycle drivers nga naga-park sa nasambit nga barangay kag ang iban nga mga bahin sang mga balay nga wala pa gihapon nabakbak kag padayon nga nagasablag sa karsada.
Suno kay Guillergan, ginabanta 150 tubtob 200 ka mga tricycle ang nagatinir kag nagapasakay sang ila mga pasahero sa Brgy. Railway, kag nagadul-ong sang mga ini sa nagkalain-lain nga subdivision kag mga barangay.
Makigsapol si Guillergan kay Mr. Jeck Conlu, head sang Iloilo City Public Safety and Transportation Management Office, agud mapadangat ang problema sa mga drivers nga wala nagapati kon sawayon.
Samtang, ginpahayag ni Guillergan nga sekyaron man liwat sang Public Safety and Transportation Management Office ang mga nagasablag nga balay sa ila barangay, lakip na ang ginapanag-iyahan ni anay Punong Baranggay Nestor Canong nga amo subong ang head sang Iloilo City Taskforce on Moral and Values Formation.
Nahibaluan nga ang balay ni Canong ang madugay na ginareklamo sang mga residente bangud wala ini gintandog sang ginpatigayon ang clearing sa ila baranggay apisar maathag ini nga nagasablag sa dalan.
