ILOILO CITY – Kapin sa 200 ka pumuluyo sang Brgy. Railway, La Paz, Iloilo City ang nagpirma sa petition agud ireklamo ang balay ni Task Force on Moral and Values Formation Head Mr. Nestor Canong nga nagalaksam sa dalan.
Ang nasambit nga petition ang may kaangtanan sa ginpatigayon nga Oplan Hawan.
Sa interview sang Bombo Radyo kay Brgy. Kagawad Erlinda Puertolaña, iya ginpahayag nga madugay na nga napalab-ot sa Iloilo City Engineer’s Office ang ila nga problema tuhoy sa balay ni Canong nga nagalapaw sa dalan.
Suno kay Puertolaña, kun sadto anay, two-way ang alagyan sa ila lugar apang sa subong, one-way na lang kag haluson pa nga maka-agi ang salakyan sa tion sang emerhensya.
Ginpahayag ni Puertolaña nga sa pagligad sang tion, nagadugang man ang extension sang balay ni Canong.
Sa pagkamatuod suno kay Puertolaña, nakapatigayon na sang inspection sa lugar ang Task Force on Anti-Squatting and Illegal Structures Unit ang kutub lamang sila sa pagbutang sang marka sa mga ginakabig obstruction.
Tubtub subong suno sa natungdan, wala pa sa gihapon naguba ang extension sang balay ni Canong nga nagalaksam sa dalan.
