ILOILO CITY – Nagapamalibad ang mga pumulyo sang Brgy. Railway, La Paz, Iloilo City sa pagguba sang bahin sang ila mga balay nga nagsalaksam sa dalan kon indi man pagbakbakon ang balay ni anay Punong Barangay kag subong Taskforce on Moral Values Formation Head Nestor Canong.
Suno kay Punong Barangay Reynaldo Guillergen, nagainit pa gid ang reklamo sang mga tawo sa ila barangay bangud posible nga indi ang mga ini kontento sa nakita nga indi patas nga pag-implementar sang clearing operation.
Iya ginpahayag nga sa iya una nga pagsugilanon kay Canong, ginsiling sini nga may inisyal na ini nga pagpangbakbak nga ginhimo sa iya balay apang wala pa matapos.
Ginahulat subong ni Guillergen ang himuon kag tikang ni Anti Squatting and Illegal Structures Unit Head Love Joy Hosenilla kag ni Executive Assistant for Barangay Affairs Mr. Boyet Rico.
Nahibaluan nga Oktubre 15 sang nagsabat si Canong sa Bombo Radyo nga agud nga mauntat na ang isyu tuhoy sa iya nga pagwaslik poder, siya na mismo ang magapanguna sa pagguba sang kudal nga ginapahayag nagalaksam sa dalan.
Matandaan nga gintumod ni Canong nga mahimo nga may nagahingabot lamang sa iya, rason nga siya ang ginahimu-an sang istorya.
