CALINOG, ILOILO – Ligom dulom sa gihapon ang mga otoridad sa ginapahayag abduction nga natabo sa Delgado Street, Calinog, Iloilo.
Sa nasambit nga insidente, ginpahayag sang mga witness nga may nabatian sila nga may tingog sang babaye nga nagasinggit kag nagapangayo sang tabang samtang ginasakay sa maroon nga pick-up truck pasado las-9:00 sang gab-i sang Hunyo 30.
Sang naglakat na ang pick-up truck, ginsundan ini sang lima ka mga lalaki nga nagsakay sa ila motorsiklo kag sang nagpundo ang pick-up truck, may naggwa nga lalaki nga may ginauyatan nga binangon.
Bangud sa kahangawa, wala na ginsundan sang mga ini ang pick-up truck nga sa ulihi natukiban nga ginapanag-iyahan sang residente sang Cabatuan, Iloilo.
Sa interview sang Bombo Radyo kay Police Major Myles Dieron, hepe sang Calinog Municipal Police Station, iya ginpahayag nga sang ginpadulungan nila ang balay sang nagapanag-iya sang pick-up truck, natukiban nga isa ini ka seafarer.
Suno kay Dieron, ang anak lang sang tag-iya ang yara sa balay, apang wala man ini nagakoooperar kun sa diin ang iya ginikanan.
Sa subong suno sa natungdan, wala pa sila sang may nabaton nga impormasyon nga may na-report nga na-missing.
