Inspirasyon sang kadam-an ang kaisug kag positibo nga panan-awan sa kabuhi ang isa ka 20 anyos nga painter kag cancer warrior.
Gin-diagnose nga may ara sang Acute myeloid leukemia (AML) si Allanah Penafiel, isa ka pharmacy student sa Central Philippine University (CPU) sang Marso sang nagligad nga tuig.
Ang Acute myeloid leukemia (AML) ang isa ka sahi sang blood cancer.
Ang acute nga sahi sang leukemia kaangay sang AML, amo ang bone marrow cells nga wala nagadako ukon abnormal cells.
Ini amo ang mga immature cells nga ginatawag blasts nga nagakadevelop sa lawas sang tawo.
Sa interview sang Bombo Radyo kay Allanah Penafiel, iya ginpahayag nga apisar sang iya nga sakit, wala niya ginapabay-an ang iya kaugalingon nga malunod sa kasubo kag depresyon.
Nangin kabahin naman sang iya kabuhi ang iya mga artwork sa diin nangin instrumento man ang painting sa iya agud nga mapabutyag ang iya nabatyagan nga kasubo sa iya ginapangatubang nga pagtilaw sa kabuhi.
Ang painting ang iya na nangin coping mechanism sa nagapadayon sini nga chemoteraphy.
Bag-o pa siya ma-diagnose nga may leukemia, nakahiligan sini nga i-paint ang itsura kag expressions sang mga tawo.
Nagdesisyon man ini nga ibaligya ang iya mga paintings bangud iya man nakita nga nagakabudlayan na ang iya pamilya sa pinansyal nga aspeto.
Indi man malikawan nga maluoy sa iya kaugalingon si Lala bangud man gusto man sini nga ma-enjoy ang iya kabuhi.
Apang bangud sa iya diagnosis kag immuno comrpmise pa gid ini, limitado ang iya maubra kag indi man ini makagwa sa hospital room.
Makapila man sini kabeses ginpamangkot ang ‘purpose’ sang iya nga kabuhi.
Apang bilang isa ka anak, luyag niya nga hatagan sang kusog ang iya pamilya nga iya kaupod sa pakigbato sa iya nga balatian.
Tuman naman kasakit para sa isa ka Iloy nga makit-an gakabudlayan ang iya nga bata.
Sa interview sang Bombo Radyo kay Donna Penafiel, iloy ni Allanah, iya ginpahayag nga sang iya nahibaluan nga may balatian nga leukemia ang iya anak, tuman ini nga na apektohan.
Nag leave ini sa trabaho sa sulod na sang duha ka bulan agud nga matutokan ang pagbantay sa iya bata.
Bilang isa ka Iloy suno sa iya, iya ginlauman nga mangin maayo kag ‘smooth going’ ang kabuhi sang iya anak.
Makapila naman ini ka bes nga ginkwestyon ang Ginoo kun ngaa ang iya pa anak ang ginhatagan sang kabudlay nga kuntani siya na lang ang maka-eksperyensya.
Nag-abot man sa punto sang iya kabuhi nga iya ginpangabay sa Ginoo nga paayuhon ini ukon iya nalang kuhaon ‘preacefully’ agud nga mauntat na ang pain nga nabatyag sang iya bata.
Apang, suno sa natungdan, tubtob nga gusto mabuhi ni Allanah, kaupod niya ang iya Iloy sa pakigbato sa ini nga pagpanghangkat sa kabuhi.
