ILOILO CITY – Apektado ang baligya-anay sang chorizo sa Lapaz Public Market sa syudad sang Iloilo.
Ini ang kasunod sang natabo nga paglamon sang meat mixer sa isa ka empleyado sang frozen food factory sa Brgy. Mansaya, Lapuz, Iloilo City.
Sa interview sang Bombo Radyo kay James, manugbaligya sang chorizo sa nasambit nga merkado, iya ginpahayag nga pigado ang ila kita bangud nga kalabanan sa mga manugbakal ang nagalikaw na sa pagbakal sang chorizo bangud sa kahangawa nga may yara ini sang simpon nga karne sang tawo.
Kun may yara man sang nagabakal suno kay James, ila gid nga ginabusisi kag ginahibalo kun sa diin naghalin ang produkto.
Kun ipaanggid sa mga nakaligad nga bulan, ginpahayag ni James nga mas naggamay ang ila kita kun baligya-anay sang chorizo ang pagahambalan.
Samtang, halos katunga naman sang kita ni Manong Untoy ang nadula kasunod sang makasiligni nga hitabo.
Sa interview sang Bombo Radyo kay Manong Untoy, iya ginpahayag nga kun sadto, nagalab-ot sa 40 ka dosena sang chorizo ang iya mabaligya sa sulod sang isa ka adlaw.
Sa subong suno kay Manong Untoy, nagalab-ot na gid lamang sa 15 tubtub 20 ka dosena ang ila mabaligya sa sulod sang isa ka adlaw.
Ginpahayag ni Manong Untoy nga bisan pa nga sa Guimaras naghalin ang iya ginabaligya apang indi man sa gihapon malikawan ang pagkahangawa sa mga manugbaligya.
