Nagpaguwa sang statement ang Department of Foreign Affairs (DFA) nga gina-kondenar sang Pilipinas ang pagpalupad sang North Korea sang ballistic missile.
Suno sa ahensya, ang aktwasyon sang Democratic People’s Republic of Korea ang nagapukaw sa tensyon kag nagaguba sa kalinong sa Korean Peninsula kag sa Indo-Pacific region.
Disyembre 18 sang gin-test fire sang Pyongyang ang ila pinaka-moderno nga intercontinental ballistic missile nga may ikasarang nga makalab-ot pati sa Estados Unidos sang Amerika.
Nagdugang pa ini sa record-breaking nga numero sang weapons tests subong nga tuig kag nagdugang man sa mga ginakondenar sang nagkalain-lain nga mga pungsod.
Ini nga test ang kasunod sang paandam sang Amerika kag South Korea sa Pyongyang nga anuman nga atake sa Washington kag Seoul ang maga-resulta sa pagpanas sa rehimen sang North Korea.
Nagsabat man si North Korean leader Kim Jong Un later nga indi mag-alang-alang ang Pyongyang nga maglunsar sang nuclear attack kun gamitan man sila sang nuclear weapons.# (EPA-EFE/KCNA)
