ILOILO CITY–Ginabanta 30,000 pesos nga balor sang iligal nga druga ang nakuha sa posisyon sang lima ka mga suspek sa ginpatigayun nga buy bust sa Jaro Plaza, Jaro, Iloilo City.
Ang subject sang buybust operation amo si Francis Yap sang Janiuay Iloilo, samtang ang iban pa kaupdanan ang ginkilala nga kanday Enrique Julian Marinue 22 anyos sang Valladolid, Negros Occidental, Dholor Canuete 35 anyos sang Democracia, Jaro, Iloilo City, John Francis Aspa 23 anyos sang Jibolo, Janiuay, Iloilo, Alvin Bonotano 32 anyos sang Jaro, Iloilo City kag Archie Gonzales 31 anyos sang Nabitasan, La Paz Iloilo City.
Sa interview sang Bombo Radyo kay SPO1 Alfred Tilano, pinuno sang City Drug Enforcement Unit (CDEU), ginpahayag sini nga nadakpan ang mga suspetsado pinaagi sa impormasyon nga ginhatag sang Barotac Nuevo PNP nga may mga indibidwal sa syudad nga nagabaliya sang druga kag taga probinsya ang ginabaligyaan.
Suno pa kay Tilano, si Yap ang nagapangita sang kontak agud makabaligya sang druga.
Pahayag pa ni Tilano nga sa Bacolod City nagakuha ang mga suspek sang suplay sang druga kag sila mismo ang nagatabuk agud nga kuhaon ang suplay.
Nakuha sa mga natungdan ang 5 ka plastic sachet sang ginapatihan shabu nga nagabalor sang 30,000 pesos, isa ka plastic sachet sang ginapatihan shabu bilang buy bust item, isa ka dako nga sachet sang marijuana nga ginabanta nagabalor sang 500 pesos, kag 5,000 pesos nga buy bust money.