ILOILO CITY – Nagdangat na sa $72.178 billion ukon ₱4.019 trillion ang balor sang investment sa nagkalain-lain nga stages ang nakuha sa mga foreign trips ni President Ferdinand Marcos Jr. humalin sang nagpungko ini sa pwesto.
Ini ang suno sa Presidential Communications Office nga ginbase sa report sang Department of Trade and Industry.
Ang ini nga mga investments ang ginapahayag nga yara sa business and investment promotions, operations, kag ginpirmahan nga mga kasugtanan nga natuman na kag na-consolidate ukon ang gin-combine bilang financial items para sa nagkalain-lain nga sector sa teknolohiya, manufacturing, ikaayong lawas, energy kag iban pa nga investment services.
Kun pahat-pahaton, ₱11.4 billion ang natipon sa negosyo kag investment promotion agency registered with operations; ₱54.75 billion sa business investment promotion agency registered; ₱282.8 billion sa investment promotion agency registration in-progress operations.
Gina-monitor man sang ahensya ang 20 ka mga aprubado kag rehistrado nga mga proyekto nga yara na sa pipeline para sa mga sector kaangay sang manufacturing, Information Technology and Business Process Management, renewable energy, data centers, kag telecommunications.
Lakip sa mga investments nga gina-monitor amo ang siyam ka mga proyekto nagikan sa iya trip sa ASEAN-Japan Commemorative Summit sa Tokyo nga nagdangat sa ₱14 billion; kag anum ka mga proyekto nagikan sa iya paglakat sa Asia-Pacific Economic Cooperation Leaders’ Meeting sa San Francisco, California, sa Estados Unidos nga nagadangat sa ₱37.2 billion.
Pahayag pa sang Presidential Communications Office, may yara sang tatlo ka mga ginpirmahan nga kasugtanan nga may klaro na nga financial project values nga nagadangat sa P4.7 billion, kag anum ka mga memorandum of agreement nga nagdangat sa P9.8 billion.
