ILOILO CITY – Nagdangat sa P2,250,000 ang balor sang kahalitan nga natuga sang sunog sa Barangay Rizal Pala-Pala II, Iloilo City Proper.
Sa interview sang Bombo Radyo kay Senior Fire Officer 1 Jake Ronald Solis, arson investigator sa Iloilo City Fire Station, iya ginpahayag nga 84 tanan ka mga balay ang apektado sang nasambit nga sunog.
Sa amo nga numero, 63 ka mga balay ang gintupok gid sang kalayo samtang 21 naman ang nakaangkon sang partial nga halit.
Suno kay Solis, makitid ang lugar kun sa diin, isa lamang ka firetruck ang maka-igo.
Ikit-ikit ang mga panimalay sa lugar kag alaban diri ang human sa light materials.
Sa subong, temporaryo nga nag tinir ang apektado nga mga residente sa Rizal Elementary School, sa multi-purpose building, kag sa Day Care Center sa barangay.
Lakip sa inisyal nga nahatag sang Iloilo City Government amo ang pagkaon kag non-food items kaangay sang habol, banig, kaldero, kag mga panapton.
