Nagsaka pa sa masobra P10 billion ang balor sang kahalitan sa sektor sang agrikultura bangud sa sunod sunod nga paglaslas sang tropical cyclones sa Pilipinas.
Suno sa Department of Agriculture, wala pa nalakip diri ang balor sang damage nga nadulot sang bagyo Pepito nga nakagwa na sa Philippine Area of Responsibility sang Lunes.
Ginpahayag ni Agriculture spokesperson Arnel De Mesa, ang mga agri area nga dapat naga-recover na ang nabudlayan nga makatibawas bangud sa sunod-sunod nga bagyo.
Pila sa lugar nga tuman nga apektado amo ang Cagayan Valley, Central Luzon, kag Bicol.
Ang mga talamnan sa Camaligan, Camarines Sur, kag Casiguran, Aurora ang nalumos sa baha.
Na-damage man ang mga pananom sa Balatan, Camarines Sur, kag Baggao, Cagayan.
Nag-request na ang ahensya sang additional P1 billion agud buligan ang mga mangunguma kag manugpangisda nga makarecover.
Plano naman sang ahensya nga mag- import sang 8,000 metric tons sang isda agud masiguro ang suplay sini ilabi na nga may closed fishing season sa pila ka lugar sa pungsod.
Ini magluwas pa sa initial 30,000 metric tons nga nag-abot sa Pilipinas.
