ILOILO CITY – Ginalauman nga maga-triple pa ang balor sang kapyerdehan sa seaweed industry sa banwa sang Caluya, Antique sa tion nga indi pa makahatag sang go signal ang Bureau of Fisheries and Aquatic Resources VI nga mahimo na nga makapanguha sang tambalang.
Ini ang kasunod sang natabo nga oil spill sa pila ka bahin sang banwa nagikan sa naglugdang nga MT Princess Empress sa Oriental Mindoro.
Sa interview sang Bombo Radyo kay Antique Governor Rhodora Cadiao, iya ginpahayag nga sa tion nga indi pa makahatag sang clearance ang Bureau of Fisheries and Aquatic Resources VI, posible nga padunuton nalang ang mga tambalang.
Kun matabo, maga-triple ang P20 million nga una nga na-report nga balor sang kapyerdehan sa seaweed industry.
Samtang nga wala pa sang palangabuhian ang mga tawo, ginpahayag ni Cadiao nga padayon ang assistance nga ginahatag sang gobyerno.
Sa subong, ginapahimo sang oil spill boom ang mga seaweed growers nga amo ang gamiton sang probinsya sa tion nga matabo ang ikaduha nga wave sang oil spill.
Base sa report nga nakuha ni Cadiao, ginakabalak-an sa subong sang gobyerno nga maglupok ang isa pa ka barge sang motor tanker, kun sa diin, mas dako ang volume sang langis nga mahimo nga maglapta pa sa iban nga lugar.
Sang nagligad nga semana, gin-lift na sang local government unit sang Caluya, Antique ang fishing ban.
Apang, indi sa gihapon mahimo nga magpangisda sa kadagatan sang Sitio Sabang, Toong, Sigayan kag Sitio Liwagao.
Magluwas sa mga manugpangisda, ginpahayag ni Cadiao nga apektado man ang turismo sang nasambit nga banwa.
