ILOILO CITY– Ginpapreso sang tiayon ang iya bana bangud sa masami nga pagpahubog.
Ang tiayon ang ginkilala nga si alyas Jona, 21, samtang ang bana naman ang ginkilala nga si alyas Gilbert, 28, kag pumuluyo sang Brgy. La Granja, Lapaz, Iloilo City.
Sa interview sang Bombo Radyo kay alyas Gilbert, iya ginpahayag nga hubog siya sang nagpauli sa ila balay kag gina angga-angga niya ang iya tiayon apang hinali lang siya nga ginhampak sang tray kag ginsumbag.
Suno kay alyas Gilbert, nagapalanakit pa ang iya guya sang gindala siya ni alyas Jona sa La Paz Police Station kag ginreklamo sa Women’s and Children’s Protection Desk.
Luyag man niya suno kay alyas Gilbert nga ipahibalo nga palangga gid niya ang ya tiayon.
Ginkantahan pa sang bana ang tiayon nga si alyas Jona sang ambahanon nga Pusong Ligaw.
Nahibaluan nga natak-an na si alyas Jona bangud masami na lang nagapauli nga hubog si alyas Gilbert.
Sa subong, preso sa gihapon sa La Paz Police Station si alyas Gilbert.
