NEW LUCENA, ILOILO – Presuhan ang gindangatan sang isa ka bana matapos ginlabo sang espading ang linya sang kuryente lakip na ang poste sang Iloilo 2 Electric Cooperative Inc. (ILECO 2) sa New Lucena, Iloilo.
Ang bana nga napreso amo si John Baron, 27 anyos sang Brgy. Jelicuon Oeste sa nasambit nga banwa.
Sa interview sang Bombo Radyo kay Police Staff Sergeant Agar Octaviano, imbestigador sang New Lucena Municipal Police Station, iya ginpahayag nga may yara sang indi pag-intindihanay sa tunga sang mag-asawa bangud lamang sa mini sound.
Suno kay Octaviano, wala nagpasugot ang tiayon nga patukaron ang mini sound bangud nga tuman pa ka aga kag nagakatulog pa ang ila mga kabataan
Bangud nga yara sa impluwensya sang makahulubog nga ilimnon, nagkuha sang espading ang bana kag ginlabo ang linya sang kuryente nga naga-angot sa ila balay.
Magluwas diri, wala pa nakuntento ang bana kag ginlabo ang poste sang ILECO 2 kag gilayon nga nagpalagyo sang nakahibalo ang mga barangay officials tuhoy sa natabo.
Nagdesisyon ang tiayon nga ipapreso ang bana bangud sa pagmaoy sa tion nga mahubog.
