ILOILO CITY – Indi na maghatag pa sang tyansa ang bana sa iya nga tiayon nga naaktuhan nga upod ang kirido sa sulod sang Katrina Lodge sa Hechanova St., La Paz, Iloilo City.
Ang tagreklamo amo si alyas Roldan, 34, samtang ang ginareklamo naman amo si alyas Lorena, 32, kag ang kirido nga si alyas JB, isa ka Overseas Filipino Worker (OFW) sang Brgy. Calumpang, Molo, Iloilo City.
Sa interview sang Bombo Radyo kay Roldan, iya ginpahayag nga indi na niya masarangan nga batunon sa liwat si Lorena bangud gintapakan na sini ang iya pagkatawo.
Suno kay Roldan, indi niya luyag nga makabalik si JB sa pungsod nga iya ginatrabahuan bangud pasakaan na niya sang kaso ini subong nga adlaw.
Maguwa na kuntani sa luwas sang pungsod si JB sa Hulyo 20.
Dugang pa sang bana, wala na siya sang mensahe sa iya nga tiayon apang i-congratulate na lang niya ini kag ang kirido.
Nahibalaun nga 14 ka tuig na nga kasal sanday Roldan kag Lorena kag may yara sang tatlo ka mga kabataan nga naga-edad sang 14 anyos, 13 anyos kag walo ka tuig.
